ព្រះតេជគុណ សាន សុជា៖ អ្នកសម្លាប់កែម ឡី អាចស្លាប់មុនកែម ឡី!
ព្រះតេជគុណ សាន សុជា ត្រូវបានពុទ្ធបរិស័ទដែលប្រារព្ធពិធីបុណ្យសពលោកបណ្ឌិត កែម ឡី គម្រប់ខួប ១០០ ថ្ងៃ នៅប្រទេសអូស្ត្រាលី និមន្តទៅទេសនាក្នុងពិធីបុណ្យនៅថ្ងៃទី ៩ ខែតុលា នេះ។
នៅចំពោះមុខអ្នកចូលរូមបុណ្យសពលោក កែម ឡី រាប់រយនាក់ ធម្មកថិកដែលពូកែពន្យល់ហេតុផល និងងាយឲ្យអ្នកស្តាប់យល់អង្គនេះ បានរម្លឹកពីអនុស្សាវរីយ៍ ដែលលោកបណ្ឌិត កែម ឡី ធ្លាប់លបទៅស្តាប់ព្រះអង្គទេសទេសនា កាលពីលោកបណ្ឌិតនៅមានជីវិត និងវីរភាពរបស់លោក កែម ឡី ក្នុងការចែករំលែកនូវគំនិត ឬបំភ្លឺផ្លូវដល់ប្រជាពលរដ្ឋខ្មែរ។
ជាមួយគ្នានេះ ធម្មកថិកអង្គនេះ បានប្រៀបធៀបពីការស្លាប់របស់លោក កែម ឡី និងអ្នកសម្លាប់លោកបណ្ឌិតបែបនេះថា៖« អ្នកសម្លាប់កែម ឡី អាចស្លាប់មុនកែមឡី ពីពិភពលោកនេះ តែឈ្មោះ កែម ឡី អាចរស់នៅយូរជាងអ្នកសម្លាប់ទៅទៀត គាត់នឹងរស់នៅជាមួយគំនិតប្រាជ្ញារបស់គាត់ ជាមួយនឹងកេរ្តិ៍ឈ្មោះរបស់គាត់។ ព្រះពុទ្ធប្រាប់ថា បើស្រឡាញ់អ្នកស្លាប់ទៅ ទី ១ បំពេញបំណងដែលមិនទាន់បានសម្រេចរបស់អ្នកស្លាប់ ទី ២ ត្រូវគិតទៅដល់អ្នករស់នៅបច្ចុប្បន្ន គឺសង្គ្រោះអ្នកនៅរស់»។
ព្រះតេជគុណមានថេរដីកាទៀតថា ទស្សនៈ និងគំនិតរបស់ លោក កែម ឡី មិនមែនបញ្ចប់ត្រឹមមរណភាពលោកនោះទេ។ «លោក កែម ឡី មិនមែនបញ្ចប់ត្រឹមនេះទេ យើងស្រឡាញ់ កុំស្រឡាញ់តែមួយឆាវ។ បើស្រឡាញ់គាត់ ជួយពង្រីកគំនិត ស្នាដៃរបស់គាត់»។ ព្រះអង្គបន្ថែមដូច្នេះទៀតថា៖«បើការស្លាប់នោះ បានដូរនៅទឹកចិត្តស្នេហាជាតិ ដាស់ស្មារតីមនុស្សដែលដេកយូរហើយ ឲ្យក្រោកបាន ការស្លាប់នោះពិតជាសមគួរដល់ការបូជា»៕
ប្រភព៖ ថ្មីៗ
ព្រះតេជគុណ សាន សុជា៖ អ្នកសម្លាប់កែម ឡី អាចស្លាប់មុនកែម ឡី!
Reviewed by Unknown
on
October 10, 2016
Rating:
Reviewed by Unknown
on
October 10, 2016
Rating:
No comments: