ការកែសម្ផស្សកំពុង​​ពេញ​​និយម​​ខ្លាំង​​ក្នុង​ចំណោម​តារា​ខ្មែរ

ការកែសម្ផស្សដើម្បីឱ្យ​មាន​ភាពទាក់ទាញ​ពីអ្នកមហាជន និងអ្នកគាំទ្រ​របស់ខ្លួន កំពុង​តែ​កើនខ្លាំង នៅក្នុង​ចំណោម​សិល្បករ សិល្បកា​រិនីនា​ពេលបច្ចុប្បន្ន។

អ្នកស្រី ហូវ ដាណេ អគ្គនា​យកា​ម​ជ្ឈមណ្ឌលកែ​សម្ផស្ស ឌែរម៉ូ គ្លីនិក (Dermo Clinic) បាន​និយាយ​ថា មិនថា​តែតារា​ចាស់​ក្មេង រឺមហា​ជនក្រៅរង្វង់​សិល្បៈ​ប៉ុណ្ណោះទេ វិធីកែសម្ផស្ស​ធ្វើយ៉ាង​ណា​ឱ្យស្អាត និងមាន​ភាព​ទាក់ទាញ កំពុងតែ​រីកចម្រើន​ខ្លាំង​នៅប្រទេសកម្ពុជា។ “សិល្បករ សិល្បការិនី ក៏ដូចជា​តារា​ចម្រៀង​នៅក្នុង​ស្រុក គឺជានិច្ចជា​កាល គាត់តែង​តែ​អញ្ជើញ​ទៅថែរក្សា​សម្ផស្ស ក៏ដូច​ជាវះកាត់​កែសម្ផស្ស​ខ្លះៗ​នៅ ឌែរម៉ូ គ្លីនីក ។ គ្រាន់​តែថា នាង​ខ្ញុំមិន​អាច​និយាយ​ឈ្មោះ​គាត់ជា​ចំហបាន​ទេ ព្រោះថា ឌែរម៉ូ គ្លីនីក យើង​មាន​ក្រុមសីលធម៌ មិន​អាច​ឱ្យ​សាយ​ភាយ ពីសេវាកម្មកែ​សម្ផស្ស​នៅគី្លនីក​យើង​បានទេ” នេះបើ​តាម​កិច្ចសម្ភាសន៍រវាង អ្នកស្រី ដាណេ ជាមួយ​និងអ្នកសារព័ត៌មាន។

អ្នកស្រី​បន្តថា តម្រូវការកែសម្ផស្ស​របស់សិល្បករ សិល្បការិនីខ្មែរ គឺកើនឡើង​គួរឱ្យកត់សម្គាល់ បើធៀប​នឹងឆ្នាំមុនៗ រហូតដល់៥០ ទៅ៦០ភាគរយ។ ដូច្នេះហើយទើប​មជ្ឈមណ្ឌល​របស់អ្នកស្រី បានសហការជាមួយ​និងប្រទេសថៃ និងកូរ៉េខាងត្បូង ដើម្បីបំពេញ​តម្រូវកា​រទីផ្សារដែល​កំពុងកើនឡើងខ្លាំងនៅ​ពេលនេះ។

តារាសម្តែង និងជាពិធីកា​រិនីកញ្ញា សូ ដារីតា ទទួលស្គាល់​ថាការ​កែសម្ផស្ស ទាំងវិធីវះកាត់ និងមិនវះកាត់ គឺកំពុងកើន​ឡើងពិត​មែនក្នុង​ចំណោមសិល្បករខ្មែរនា​ពេលបច្ចុប្បន្ន ហើយកញ្ញា ក៏ទទួលស្គាល់ថា នាង​ក៏ធ្លាប់កែសម្ផស្ស​ដូចតារា​មួយចំនួនផងដែរ។ កញ្ញានិយាយ​ដោយឥត​លាក់បាំងថា កញ្ញាធ្លាប់​ចាក់មុខវី (V) នៅ ឌែរម៉ូ គ្លីនិក ហើយកញ្ញា​ក៏មានទំនុកចិត្ត​លើថ្នាំ និងជឿជាក់​លើគ្លីនិកកែ​សម្ផស្សមួយនេះ មុន និង​ក្រោយ​ពេលទទួលលទ្ធផល។

ចំណែកឯ​កញ្ញា ថន លក្ខណា ជាពិធីការិនី និងតារា​សម្តែង ក៏សារភាព​ដែរថា កញ្ញាធ្លាប់កែ ច្រមុះ និងវះកាត់​បបូរមាត់ ដោយសារ​តែវា​ជាបញ្ហាសំខាន់​លើរូប​កញ្ញា ទើបកញ្ញា​សម្រេច​ចិត្តថាកែ។

សិល្បករ សិល្បកា​រិនីខ្មែរ តែងតែ​ទៅប្រទេថៃ កូរ៉ខាងត្បូង និងសិង្ហបុរី ជាដើម ដើម្បីកែ​សម្ផស្សទៅ​តាមអ្វីដែល​ពួក​គេចង់បាន។ ប៉ុន្តែ​សម្រាប់​ពេលបច្ចុប្បន្ន តម្រូវការ​ចេញទៅក្រៅ​ប្រទេសបាន​ធ្លាក់ចុះ ដោយសារតែកម្ពុជា​មានមជ្ឈមណ្ឌល​កែសម្ផស្ស ដែលអាចផ្តល់​សេវាកម្ម​នេះបាន នេះបើអ្នកស្រី ហូវ ដាណេ អគ្គនាយកា​មជ្ឈមណ្ឌល​កែសម្ផស្ស ឌែរម៉ូ គ្លីនីក (Dermo Clinic) ៕

  

ប្រភព៖ PNN