អាយ៉ៃឆ្លើយឆ្លង ម៉េង កែវពេជ្ជតា និង ដេនីន ខ្វាន់

រាជធានីភ្នំពេញ ៖ ខណៈលោក សុះ ម៉ាច ប្រធានសមាគមសិល្បករខ្មែរគ្រោងធ្វើសន្និសីទកាសែត និងប្រមូលសំឡេងពីអ្នកសិល្បៈឲ្យបានច្រើនដើម្បីដាក់ញត្តិសុំឲ្យ ក្រសួងវប្បធម៌ និងវិចិត្រសិល្បៈលុបឈ្មោះនាង ដេនី ខ្វាន់ ចេញពីបញ្ជីអ្នកសិល្បៈ ព្រោះសំអាងលើនាងធ្វើឱ្យប៉ះពាល់ដល់វប្បធម៌ សិល្បៈជាតិនោះ ស្រាប់តែ ដេនី ខ្វាន់ បន្ទន់ឥរិយាបទដោយចេញវីដេអូឃ្លីបសូមទោសសាធារណជន ។
ទោះជាយ៉ាងណាក្តី ដេនី ខ្វាន់ មិនសុំទោសអ្នកដែលនាងចាត់ទុកថាមាក់ងាយនាងឡើយ ដែលទំនងផ្តោតលើអ្នកនាង ម៉េង កែវពេជ្ជតា និងលោក អ៊ឹម ជីវ៉ា ។ ដេនី ខ្វាន់ ថា អ្នកទាំងនោះមើលងាយនាងមុន ហើយមិនមែនរិះគន់ក្នុងន័យស្ថាបនាទេ ។
មុនពេលចេញវីដេអូឃ្លីបសុំទោសកាលពីថ្ងៃទី១៣ ឧសភា ២០១៦នោះ ដេនី ខ្វាន់ បានវាយប្រហារតបទៅអ្នកនាង ម៉េង កែវពេជ្ជតា ដែលរិះគន់នាងថា «ឆ្ងល់ណាស់ម៉េចក៏មករមាស់តែរឿងខ្ញុំចឹង ? ខ្ញុំជាឃាតករ ឬក៏ដើរលួច ឆក់ ប្លន់គេបានជាម្នាក់ៗប្រឹងបើកបំពង់កស្រែកម្ល៉េះ? ដូចជាមីងម្នាក់ចឹងតាំងខ្លួនឯងត្រឹមត្រូវ និងថ្លៃថ្នូរណាស់ ទាំងដែលខ្លួនឯងរលួយវ៉ល់មិនគិតផង... ខ្ញុំសិចស៊ី ក៏សិចស៊ីតែកាយ មិនដូចអ្នកសុភាពនឹងលើរង្គើក្រោមនោះទេ ។ មីងឯងនិយាយថាឱ្យខ្ញុំបានល្អណាស់ តែខ្ញុំក៏ចង់ប្រាប់ទៅមីងវិញដែរ... មីងថាខ្ញុំថោក ហើយខ្លួនមីងថ្លៃណាស់ គឺថ្លៃពេកហើយ ថ្លៃដល់ថ្នាក់ប្តីលែងក្បាល និងហែកកេរ្តិ៍ពេញប្រទេសថា ខ្លួនមានសហាយ ហ្នឹងហើយឬអ្នកថ្លៃថ្នូរ ? តាមខ្ញុំដឹងខ្លួនមីងធ្លាប់ស្លៀកពាក់សុភាពជិតលើជិតក្រោមដែរ តែក៏ត្រូវគេរិះគន់ពេញប្រទេសម៉េចមិនគិតផង... ខ្ញុំមិនខឹងទេ ព្រោះមីងចាស់ហើយអាចនឹងមានបញ្ហាខាងខួរក្បាល ព្រោះពីមុនត្រូវប្តីវ៉ៃទាត់ធាក់ឡើងសរសៃប្រសាទហើយ ជូនពរឆាប់ជាពីជំងឺសរសៃប្រសាទណា (ផ្ញើជូនអ្នកមីងផ្កាវល្លិផោម)» ។
កាលពីរាត្រីថ្ងៃទី១២ ឧសភា លើទំព័រហ្វេសប៊ុករបស់ខ្លួន អ្នកនាង ម៉េង កែវពេជ្ជតា បានសរសេរវាយបកនាង ដេនី ខ្វាន់ ថា «អស់ពេលពេញមួយថ្ងៃហើយដែលនាង និងបងប្អូន បក្សពួកនាងអង្គុយជេរយើង ។ ជេរបានល្អ មិនហត់ មិនចេះខ្វះពាក្យ ។ ពិតជាកែមិនឡើងមែន ដូចពាក្យចាស់ពោលថា «កុំពត់ស្រឡៅ កុំប្រដៅស្រីខូច !» ត្រឹមត្រូវណាស់ ។ នេះជាសន្តានពិតរបស់នាងហើយ ។ នាងច្រឡោតខឹង និងក្រពុលមុខខ្លាំងណាស់ ព្រោះមានគេទើសនាងច្រើន រួមទាំងយើងដែរ ។ ត្រូវហើយយើងពិតជាទើស ពិតជាមិនសុខចិត្តដែលនាងយករូបភាព សកម្មភាពបែបនេះមកសាបព្រួសលើឆាកសិល្បៈ យើងត្រូវតែទើស ! បើយើងទើសមែនតើវាយ៉ាងម៉េច? នាងមានបញ្ហាអ្វីឬ? នាងបានជេរចំអកឲ្យអ្នកសិល្បៈមិនរើសមុខ និងមហាជនថាគេច្រណែន ព្រោះគ្មានរបស់ល្អបង្ហាញដូចនាង? ម្តេចក៏ដឹង? ម្តេចក៏នាងមានមោទនភាពនឹងខ្លួនឯងខ្លាំងម្ល៉េះ ?
នាងភ្លេចគិតអ្វីម្យ៉ាងហើយថា រាងកាយក្លែងក្លាយបង្កប់ដោយជាតិគីមីរបស់នាង តើធ្វើម្តេចឲ្យពួកយើងច្រណែននាងកើតទៅ ? តែដែលគេមិនបង្ហាញនោះ ព្រោះខ្លួនប្រាណគេមានតម្លៃថ្លៃណាស់ មិនមែនអ្នកណាក៏ចេះតែមើល ចេះតែឃើញ ចេះតែប៉ះបាន ទទេៗ ថោកៗដូចរបស់នាងឡើយ ។ នាង និងបងប្អូននាងបានដៀលមហាជនថា អត់ខួរ ខួរកំពិស ខួរបង្កង ។ មិនឆ្អែត នាងមកដៀលយើងថាសរសៃប្រសាទទៀត ប៉ុន្តែគឺនាងទៅវិញទេតើដែលគ្រប់គ្នាមើលឃើញថា ពួកនាងមិនមែនសរសៃប្រសាទទេ គឺឆ្កួតពេញទំហឹងតែម្តង ដោយសារតែក្នុងខ្លួននាងផ្ទុកដោយជាតិគីមីច្រើន ទើបធ្វើឲ្យនាងឆ្កួតៗ និងចង់ល្បីសម្រស់សិប្បនិមិត្ត ឆ្កួតនឹងតណ្ហា ឆ្កួតនឹងសម្ភារ លុយ ឡានបន្តិចបន្តួច ព្រោះបើមនុស្សល្អជាគេមិនធ្វើអាវ៉ាសែដូចនាងឡើយ ។
ទស្សនៈលេលារបស់នាងដែលថា សិចស៊ីតែកាយដូចនាង វាល្អជាងអ្នកដែលស្លៀកពាក់ជិតតែនឹងលើរង្គើក្រោម ពិតមែនឬ ? បើអ៊ីចឹងបងប្អូនស្ត្រីដែលស្លៀកពាក់ស្អាតៗបិទជិតសាច់នោះសុទ្ធតែ ជាស្រីថោកទាបឬ ? ហើយស្លៀកដូចស្រាតរបៀបពួកនាងទើបថ្លៃថ្នូរមែនទេ ? ពេលឃើញសារ និងស្តាប់សម្តីនាងហើយ ទើបដឹងថានាងខុសគេ គ្មានកេរ្តិ៍ខ្មាស ខ្វះការរៀនសូត្រ មានចំណះតិចតែល្បិចច្រើន និងគ្មានជំនាញសិល្បៈអ្វីបន្តិចសោះ និយាយឲ្យងាយយល់ គឺមិនមែនជាតារា ឬអ្នកសិល្បៈអ្វីទាំងអស់មិនដឹងថា ពួកនាងងើបពីភក់ជ្រាំណាមកទេ ។ ពាក្យសម្តីខ្វះសីលធម៌ ខ្វះភាពទទួលខុសត្រូវ មិនហ៊ានទទួលយកការណ៍ពិត បែរជាមកជេរប្រមាថទាំងក្តៅក្រហាយគ្មានមូលដ្ឋាន និងខំកកាយខ្មោចស្លាប់ជិត១០ឆ្នាំហើយយកមកផ្ចាញ់ផ្ចាល់ ទាំងដឹងរឿងមិនច្បាស់ មិនដឹងអ្នកណាលែងអ្នកណា ប្រឹងនិយាយខុសការណ៍ពិត ចាកប្រធានបទដែលទាំងអស់នេះគ្រាន់តែជាល្បិចឲ្យមហាជនភ្លេចមើលកំហុស នាង និងដើម្បីសម្រន់ភាពអាម៉ាស់ថ្នាក់ក្អួតឈាមដែលត្រូវមហាជនកំពុង ព្រួតគ្នាស្តោះទឹកមាត់ដាក់ចំកណ្តាលមុខពីគ្រប់ទិសតែប៉ុណ្ណោះ ។ តែមិនថ្វីពាក្យអសុរោះទាំងប៉ុន្មានដែលនាងជេរ បងៗមិនទទួលទេ បងសូមជូនឲ្យពួកនាងទាំងអស់ ហើយបងក៏មិនខឹងនឹងនាងដូចគ្នា តែបងមានតែអាណិត និងអនិច្ចានាងទៅវិញ ដែលនាងខំលះបង់បង្ហាញកេរ្តិ៍អស់ប៉ុណ្ណឹងហើយ បែរជាទទួលបានលទ្ធផលត្រូវមហាជនស្អប់ខ្ពើមយ៉ាងអាម៉ាស់ទៅវិញ ។ ដូច្នេះបងជូនពរនាងសូមឲ្យបានជួបជីវិតថ្លៃថ្នូរជាងហ្នឹងបន្តិចទៅ កុំឲ្យគ្រាន់តែចេញមុខមកភ្លាមត្រូវគេខាកស្តោះពេញពិភពលោកដូច្នេះ ពិតជាគួរឲ្យអាណិតណាស់ ។ សង្ឃឹមថាប្រុសស្នេហ៍ឥតខាន់ស្លារាប់រយពាន់នាក់ដែលនាងបានជួបកន្លង មក និងទៅអនាគតនឹងមិនធ្វើបាបវាយតប់ទះ ទាត់ធាក់ និងមិនលែងក្បាលនាងចោលដោយសារតែចរិតជាស្រីអាស ជាស្រីសោភិនីរបស់នាងទៅចុះអើយ ! » ។
ទន្ទឹមនេះអ្នកនាង ម៉េង កែវពេជ្ជតា បានស្នើថា «អ្នកសិល្បៈត្រូវរួមគ្នាបោសសម្អាត បញ្ចប់ភាពកខ្វក់ទាំងនោះដើម្បីឲ្យមហាជនមើលឃើញ និងចែកឲ្យដាច់មួយណាជាផ្កា មួយណាជាលាមក ។ ភាពថោកទាបបង្កឡើងដោយជនឆ្លៀតឱកាសមួយក្តាប់តូចនេះ ត្រូវបំបាត់ឲ្យបាន ត្រូវរៀបចំផ្ទះយើងឡើងវិញ ត្រូវឲ្យមហាជនមើលឃើញពីតម្លៃថាពិភពសិល្បៈខ្មែរពិតជាល្អផូរផង់ ភ្លឺថ្លា ចែងចាំងដូចសម័យបុព្វកាល ។ អ្នកសិល្បៈត្រូវពោរពេញដោយសមត្ថភាពពិតប្រាកដ និងត្រូវឲ្យគេដឹងថា ស្ថាប័នសិល្បៈក៏មានក្រមសីលធម៌ស្អាតស្អំ និងបទបញ្ជាផ្ទៃក្នុងដូចស្ថាប័នដទៃដែរ ។ យើងត្រូវបង្កើនចំណេះដឹងសិល្បៈឲ្យបានច្រើនដើម្បីបង្កើនទំនុកចិត្ត ដល់មហាជនទស្សនិកជន »។
មានអ្នកសិល្បៈមួយចំនួនមិនពេញចិត្ត ដេនី ខ្វាន់ ដែរ ដែលប្រើពាក្យសម្តីមើលងាយអ្នកសិល្បៈរៀមច្បង ។ លោកអ៊ឹម ជីវ៉ា បានសរសេរលើហ្វេសប៊ុកវាយបកទៅ ដេនី ខ្វាន់ និងបងប្អូនរបស់នាងថា «អាបិសាចឆ្អឹងសញីឈ្មោល ! ធ្វើខុសហើយមិនទទួលការណ៍ពិតទៀត ដៀមដាមគេរាល់គ្នា ។ ជេរគេចាស់ទុំ ហើយមិនព្រមទទួលខុសទៀត នៅហ៊ានមកនិយាយថាមិនដឹងអីទៀត ! ហាឡើងដៀលគេសុទ្ធតែឆ្កែទៀត ! សុទ្ធតែ «ឆ្កែខាំកុំខាំឆ្កែវិញ»។ បើមិនបានដៀមដាមថាឱ្យគេពាក្យឆ្កែឆ្មាហ្នឹង ម៉េចរន្ទះបាញ់ងាប់អី អញមិនចង់ដៀលដល់ពូជទេ ព្រោះប៉ះពាល់ដល់ចាស់ទុំ ។ ចាស់ទុំលោកមិនចង់ឱ្យកូនទៅឈ្លោះគ្នាជាមួយអ្នកណាឡើយ ចាស់ៗ លោកមិនដឹងអីទេ រឿងក្មេងៗគឺជារឿងដោយឡែក គេកែតម្រូវឱ្យពួកអ្ហែងល្អតើ មានអ្នកណាគេច្រណែនទេ... ! » ។
ចំណែកតារាចម្រៀងអ្នកនាង យុង ចាន់កន្និកា បានសរសេរលើទំព័រហ្វេសប៊ុករបស់ខ្លួនថា «ក្នុងនាមខ្ញុំជាអ្នកសិល្បៈមួយរូបខ្ញុំស្រឡាញ់ និងគាំទ្របងស្រី ម៉េង កែវពេជ្ជតា ណាស់ ប៉ុន្តែខ្ញុំក៏មិនមានមតិយោបល់អ្វីដែរ ព្រោះខ្ញុំមិនចង់ដឹងលឺទេ គ្រាន់តែឃើញការជេរប្រមាថទៅលើបង ពេជ្ជតា ខ្លាំងជ្រុល ដែលគ្រប់រូបគ្មានអ្នកណាចង់ឱ្យកើតឡើងទេ បើទោះបីគាត់ធ្លាប់ឆ្លងកាត់រឿងអាស្រូវ ប៉ុន្តែបងតែងតែធ្វើឱ្យគេស្គាល់ថាបងជាអ្នករក្សាតម្លៃសិល្បៈ និងលើកមុខមាត់សិល្បៈខ្មែរមិនថាបុរាណ ឬសម័យ បងគឺជារៀមច្បងម្នាក់ដែលតែងតែផ្តល់នូវដំបូន្មានល្អដល់ពួកខ្ញុំ អ្វីដែលមិនអាចប្រកែកបាន គឺសំឡេងដ៏ល្អរបស់បង និងចរិតរបស់បង រក្សាបាននូវតម្លៃសិល្បៈខ្មែរមិនឱ្យបាត់បង់ រឿងអតីតកាលអ្នកណាថាមិនមាននោះ ប៉ុន្តែរឿងសំខាន់គឺនៅតែមានអ្នកគាំទ្របងច្រើនជាងស្អប់ » ៕